13-14 sentyabr 2025-ci il tarixlərində Innovation and Digital Development Agency (İRİA) dəstəyi ilə Yeni Fikir tərəfindən həyata keçirilən Akademik Sahibkarlıq Əsaslı Startap və İnkubasiya Proqramı (ASSİP) çərçivəsində növbəti hakaton baş tutdu.
Bakı Mühəndislik Universitetinin (BMU) tələbə və magistrantları, həmçininmüəllimlərinin iştirakı ilə keçirilən tədbirdə dünyanın və Azərbaycanın ən aktual istiqamətləri üzrə problemlərə innovativ həllər axtarıldı:
Kibertəhlükəsizlik
Yaşıl enerji həlləri
Təhsildə rəqəmsallaşma
Yaşıl maliyyə və davamlı investisiyalar
Qaliblər
2 gün davam edən hakatonun sonunda 19 komanda öz startap layihələrini təqdim etdi. Münsiflər heyəti tərəfindən seçilən qaliblər mükafatlandırıldı:
1-ci yer – nc4DMW layihəsi – 3000 AZN
2-ci yer – AgriSat layihəsi – 2000 AZN
3-cü yer – Mynera layihəsi – 1000 AZN
Növbəti mərhələdə 10 startap layihəsi ASSİP çərçivəsində keçiriləcək inkubasiya proqramına cəlb edilməsi nəzərdə tutulub. İnkubasiya2 proqramının nəticələrinə görə ən perspektivli 3 komanda müvafiq olaraq 15000, 12000, 9000 manat pul mükafatları ilə dəstəklənəcəklər.
Əvvəlki mərhələlər
Qeyd edək ki, keçən ilin oktyabr ayında ASSİP çərçivəsində, BMU-nun 30-dan çox müəlliminin iştirak etdiyi, innovasiya ekosistemində təlimçilərin hazırlığı (TOT) proqramı keçirilmişdi. Hansı ki, həmin TOT proqramının bəzi məzunlarının da iştirakı və mentorluğu ilə 2025-ci ilin 15-16 fevral tarixlərində hakaton1 keçirilmişdi. Həmin Hakatondan məzun olan 10 satartapın inkişafı isə İnkubasiya1 proqramında dəstəklənmişdi.
Layihə haqqında
ASSİP – akademik fəaliyyətlə məşğul olan şəxslərin sahibkarlıq bacarıqlarının inkişafı, innovasiya ekosistemi üçün müəllim-mentorların hazırlanması və onların dəstəyi ilə bazara yeni startapların qazandırılması məqsədlərini daşıyır.
ASSİP İRİA-nın dəstəyi, BMU və BMU Texnoparkın tərəfdaşlığı ilə “Yeni Fikir” MMC tərəfindən icra olunur.
