“Yeni Fikir”in də tərəfdaşı olduğu “Startup School 3” çərçivəsində “Yaşıl və Rəqəmsal İpək Yolu” beynəlxalq akselerasiya proqramının rəsmi açılışı baş tutdu! 
Açılış nitqini İqtisadi İslahatların Təhlili və Kommunikasiya Mərkəzinin (İİTKM) icraçı direktoru, professor Vüsal Qasımlı etdi. O, layihənin innovasiya və sahibkarlıq ekosisteminin inkişafında, eləcə də region ölkələri arasında əməkdaşlığın gücləndirilməsindəki önəmindən bəhs edib. 
Tədbirdə İnnovasiya və Rəqəmsal İnkişaf Agentliyinin (İRİA) sədri Fərid Osmanov çıxış edərək, innovasiya ekosistemində görülən işlər haqqında məlumat verdi və startaplarla dövlət qurumları arasındakı əməkdaşlığın vacibliyini vurğuladı.
“Enterprise Azerbaijan” portalının rəhbəri İsa Qasımov isə “Startup School 3” barədə geniş təqdimatla çıxış edərək, layihəyə olan beynəlxalq marağın Azərbaycanın innovasiya sahəsində əldə etdiyi uğurların göstəricisi olduğunu qeyd edib.
Yerli ekosistem nümayəndələrinin əksəriyyətinin iştirak etdiyi tədbirdə “Yeni Fikir”in Biznesin İnkişafı ve İnnovasiyalar üzrə direktoru Telman Mustafayev iştirak edib. Qeyd edək ki, “Yeni Fikir” “Yaşıl və Rəqəmsal İpək Yolu” beynəlxalq akselerasiya proqramının təlim və mentor xidmətilərinin təşkili istiqamətində tərəfdaşıdır.
“Yeni Fikir”in icra etdiyi, Akademik sahibkarlıq əsaslı startap və inkubasiya proqramı məzunlarından olan Bioplastik komandası tədbirin iştirakçılarından idi.
Azərbaycan startaplarının qlobal arenada mövqeyini möhkəmləndirən bu təşəbbüsün bir parçası olmaqdan qürur duyuruq!
