Startap ekosistemi layihəsinə start verilib

04 Mar 2019 18:22
Startap ekosistemi layihəsinə start verilib

Azərbaycanda innovasiya ekosisteminin formalaşmasında, o cümlədən startapların inkişafında xüsusi rol oynayan Bakı Mühəndislik Universiteti (BMU) bu sahədə BP şirkəti ilə əməkdaşlığa başlayır. "Yeni Fikir VI" startap müsabiqəsi BMU-nun təşkilatçılığı və BP-nin maliyyə dəstəyi ilə həyata keçirilir. Bu məqsədlə BMU-da geniş tərkibli görüş keçirilib.

 

Tədbirdə maraqlı tərəflərlə yanaşı,Təhsil Nazirliyi NRYTN Yüksək Texnologiyalar Parkı, ASAN İnnovasiyalar Mərkəzi, İNNOLAND İnkubasiya və İnnovasiya Mərkəzinin nümayəndələri də iştirak ediblər. Universitetin rektoru, professor Havar Məmmədov bildirib ki, dünyada texnologiyanın sürətlə inkişaf etməsi ilə bağlı olaraq BMU müasir tələblərə uyğun fəaliyyət və inkişaf istiqaməti seçib. Məhz buna görə də universitetin hazırladığı kadrlar çağdaş texnologiyalardan istifadə etməyi və öz ideyalarını biznesə çevirməyi bacarmalıdırlar.

 

Rektor daha sonra qeyd edib ki, BMU-da sənaye müəssisələri üçün mühəndislik və iqtisadiyyat ixtisasları üzrə müasir nəzəri bilikli, qabaqcıl müəssisələrdə təcrübə keçən və müsbət vətəndaş xüsusiyyətlərinə malik kadr hazırlığı həyata keçirilir və universitetin gələcəkdə sahibkarlıq universitetinə çevrilməsi yönündə mühüm işlər görülür. "Yeni fikir" startap müsabiqəsi (YFM) də innovativ sahibkarlığın inkişafını dəstəkləyən layihədir. BP-nin də layihədə tərəfdaşlığı müsabiqəyə marağın daha da artacağına və yüksək səviyyədə təşkil olunacağına səbəb olacaq.

 

BP-nin ictimai laqələr, xarici işlər və strategiya üzrə vitse-prezidenti Bəxtiyar Aslanbəyli çıxış edərək şirkətin Azərbaycanda təhsil sahəsində, innovativ texnosahibkarlıq konsepsiyalarının, layihələrin və startapların dəstəklənməsi istiqamətində gördüyü işlərdən danışıb. O, bildirib ki, Azərbaycanda BP-nin həyata keçirdiyi təhsil layihələrinin əsas məqsədlərindən biri ölkənin gələcəyi üçün güclü intellektual kapitalın yaradılmasına yardım etməkdir. İnanırıq ki, "Yeni fikir VI" startap müsabiqəsi ölkənin ekosisteminin güclənməsi üçün texnologiyaya və innovasiyaya meyilli çox sayda insanın birgə işləməsi və öz intellektual bacarıqlarını və ambisiyalarını birləşdirməsi üçün böyük imkanlar yaradacaq.

 

Sonra layihə rəhbəri BMU Texnoparkının müdiri dosent İsa Qasımov müsabiqə haqqında ətraflı məlumat verib. O qeyd edib ki, BP-nin maliyyə dəstəyi ilə keçiriləcək "Yeni fikir VI" startap müsabiqəsi əvvəlkilərdən fərqli olaraq həm də ekosistemə yeni startapların daxil olmasını hədəfləyir. Layihə 7 ay müddətində bir neçə mərhələdə keçiriləcək.

 

Çıxış edənlər BMU ilə BP arasındakı əməkdaşlığı yüksək qiymətləndirib və birlikdə görüləcək işlərin faydalarından danışıblar. Sonda iştirakçılar universitetin texnoparkında fəaliyyət göstərən startapların fəaliyyəti, BP tərəfindən qurulmuş kimya mühəndisliyi və mexanika mühəndisliyi laboratoriyaları ilə tanış olublar. Qonaqlar həmçinin tələbələrin dərs prosesində laboratoriyalarda apardığı təcrübələri də yaxından izləyiblər.

 

Qeyd edək ki, müsabiqə haqqında, həmçinin startapların əldə edəcəyi imkanlar haqqında ətraflı informasiya yenifikir.az veb səhifəsində verilib. Müsabiqə qalibləri maliyyə və inkibasiya xidmətləri şəklində dəstək ala biləcəklər.

 

R.TAHİR, “Xalq qəzeti”

http://xalqqazeti.com/az/news/17818